Author Topic: CIKËL NGA PËRMBLEDHJA POETIKE"TOKË DARDANE" (Read 1417 times)

shaban cakolli · « **on:** September 05, 2009, 02:34:51 PM »

ARBËRIA

Më e moçme se hëna është Arbëria
rrënjët i shtrin
tek mitet ilire
ku perëndesha Dea
qumësht i jep
gjarpërit të shtëpisë.

Ëndërrat arbërore
me Qerren e Diellit
udhëtojnë
për të pushuar
në svastikën
e djepave tanë.

Deri sa flenë arbërorët
dy shqipe të pagjuma
ëndrrat na i ruajnë
netve me hënë.

shaban cakolli · « **Reply #1 on:** September 05, 2009, 02:35:26 PM »

DITË E VONUAR
Si pikë uji nga shkretëtira
bëhu oazë
dhe mbushi burimet
që t´i freskosh zemrat e djegura
nga vapa qiellore.

Dhe eja
ditë e ëndrrave të bardha!

shaban cakolli · « **Reply #2 on:** September 05, 2009, 02:36:14 PM »

NË BRENDI
E sotmja
qan të nesërmen,
të dyja në shpirtin tim ndeshen,
unë mes tyre përpiqem
të arrij triumfin.

shaban cakolli · « **Reply #3 on:** September 05, 2009, 02:36:59 PM »

PARA GJAMISË Së MADHE NË PRISHTINË

Në Prishtinë
para kafenesë"Besa"
bërlyket shpresa për çdo ditë.

Para Xhamisë së Madhe
tubohen mëngjezeve rinia
për të shitur rininë e vet.

Asme pishë as me qiri
kurkund s´gjen
mall më të lirë në treg.

shaban cakolli · « **Reply #4 on:** September 05, 2009, 03:03:00 PM »

Hall mbi hall

Turma shkojnë
turma vijnë
mbijnë si bari i keq
në faqen e blertë të globit

Prej shekulli në shekull
kërkojnë lëmoshë
trotuareve të fatit

Trokasin në portë të hapur
kastat luksoze
të ngopura parfumnesh
të një biznesi të ndyrë

shaban cakolli · « **Reply #5 on:** September 05, 2009, 03:03:41 PM »

Ora jonë

Gjurmë pas gjurme
bjeshkë pas bjeshke
na ndoq sopata shpatën
nëpër shekuj

Këtu varrë e atje varrë
më bëhet shpirti mulli ere
në skëterrë pas skëterre
deri kur të bredh me bredh
kështu,o shpirti im?
nga të palarat
e botës pelim

Këtu s’ jam
atje s’më lënë,
o nënë

qenia ime e ndarë në dysh
në udhëkryq

shaban cakolli · « **Reply #6 on:** September 05, 2009, 03:04:36 PM »

E bukura More

Moj e bukura More
si të lash, e më s’të pash
si të lash, si të lash
si të lash, e më s’të pash
(popullore)

Ec nëpër të kaluarën
për ta gjetur të ardhmen
ëndërro shqip,
frymo shqip
o Arvanit

Hy kalabrisht
i dehur mendimeve
arbërisht
e jetën vazhdo
prore
e dasmën
bëje pleqërisht

Edhe varrin hape
me E bukura More

Rro sa malet
me dhembjen shkëmbore
buzë detit
me shikim të humbur
nga e bukura More

shaban cakolli · « **Reply #7 on:** September 05, 2009, 03:06:49 PM »

E ndiej humbjen

Viti shkel vitin
pesha bie
pingul në shpirtin tim
tretur në mërgim

Një pjesë e diellit
m’ është shkëputur
nga qielli i bebëz
nga hija e lotit tim
derdhur
në dhe të huaj

Nëse unë s’ kthehem
hija ime do të bredhë
trotuareve të botës
pas mallit tim

Për çdo natë
e bëj nga një shtegëtim
në mendje
për në shtëpi
për amanetin e nënës
para se të japë lamtumirën
pranverave
të ikura pa kthim

shaban cakolli · « **Reply #8 on:** December 30, 2010, 04:54:55 PM »

KA KOHË
Ka kohë
që jam duke u ngjitur
Lugut të Blertë
të Gërmisë.

ka kohë që ujë pi
në krojet e fëminisë.

Ka kohë
që më janë ngatërruar kohët
dhe nuk e di kur fillon e kur mbaron
Ëndrra.

shaban cakolli · « **Reply #9 on:** December 30, 2010, 04:56:20 PM »

DARDANIA

Ja këto janë ato vise
ku pemët piqën në dimër
e lulëzojnë në verë.

Fëmijët dardanë
këmbëzbathur ecin
nëpër acarin e shekujve
për të arritur
në tokën e premtuar.

Kjo tokë është Dardania
e gdhendur në atë mburojë
që e mbajnë
luftëtarët e saj
nëpër betejat që s´i regjistroi
historia.

shaban cakolli · « **Reply #10 on:** December 30, 2010, 04:57:17 PM »

DUKE SHIKUAR ORËN

Një shekull iku
duke shikuar
diellin me zenit.

ku mbet ora jonë
që mat rrjedhën e gjakut
në histori?...

Pena ime gërryen mbi letër
hieroglifet
me të cilat kam shënuar
kronologjinë
e lindjes
deri në perëndim
të epokës së gjakut.

shaban cakolli · « **Reply #11 on:** December 30, 2010, 04:58:37 PM »

RASAT E MËRGIMTARIT
Një jetë e nemur
e lakuar nëpër
rasa.

Në emërore:Iliri!
në kallëzore:Dardani!
në rrjedhore:Kosovë!

Thirrorja është zhdukur
se nëna s´na dëgjon.

Emri ynë
edhe sot lakohet
nëpër histori.

shaban cakolli · « **Reply #12 on:** December 30, 2010, 04:59:37 PM »

DALLËNDYSHES

Shko në kopshtin tim
këput veç një mollë
ma sill tí marr erë
të bëhem erë e saj.

Ma sill një lulëkuqe
me ngjyrë të flamurit
t´ma zdriti udhën
e shtegun nëpër terr.

shaban cakolli · « **Reply #13 on:** December 30, 2010, 05:00:27 PM »

BOTA E TJETËRSUAR

Shekuj me radhë
po lind
ëngjuj dhe tiranë.

Rruga ku takohen
shtruar me të zeza,
mbretëri e tyre
shtrihet në varreza.

shaban cakolli · « **Reply #14 on:** December 30, 2010, 05:02:57 PM »

MALLËNGJIM

Motra kur u bë nuse
hapi portat e ngujuara
te një stine të re.

Qerrja e kuqe me katër rrota kohe
kaloi mbi fëmininë e saj.

Motra iku!
Ç´zog do të këndojë
në drurin e manit
mallin e saj

AlbStars · « **Reply #14 on:** December 30, 2010, 05:02:57 PM »

AlbStars