Author Topic: POETJA JONË ALMAPAPAMIHALI (Read 1279 times)

shaban cakolli · « **on:** September 05, 2009, 05:31:30 PM »

Alma Papamihali

Alma Papamihali

Alma Papamihali ka lindur ne Qershor te vitit 1974, ne Tirane. Arti i te shkruarit ne pergjithesi dhe poezia ne vecanti, ka qene nje talent i spikatur tek ajo qe ne moshe te vogel. Prezantohet per te paren here perpara lexuesit shqiptar, me nje permbledhje me 100 poezi lirike, nen titullin "Nen tingujt e nates", ne te cilin spikatin poezi me nje tematike te larmishme dhe ndjeshmeri filozofike, ku nder te tjera dallojne tema e dashurise, nostalgjise, mallit per vendlindjen etj.

shaban cakolli · « **Reply #1 on:** September 05, 2009, 05:33:13 PM »

EMIGRANTI

Diku veç në tavolinën
Me mbulesë të bardhë shtruar,
Birrë të huaj ke përpara
Dhe një pamje të menduar.

Diku veç në tavolinën
Në një qoshe të lokalit,
Shokun tënd se ke përballë
Pi vetmuar ti prej hallit.

Diku veç në tavolinën
Në një lagje të panjohur,
Gjithçka është akull e ftohtë
Vetëm birra është e ngrohur.

Diku veç në tavolinën,
Që të bën ty shoqëri
Gotën s´di ku t´a trokasësh,
Tavolina s´është njeri.

shaban cakolli · « **Reply #2 on:** September 05, 2009, 05:39:56 PM »

   Alma Papamihali


NËSE S´KE FJETUR

Mbi liqenin e mbrëmjes,
shelgjet panë në pasqyrë
si hëna u zgjua...

Nëse ende s´ke fjetur,
fute hënën brenda,
bashkë me të dhe mua...

shaban cakolli · « **Reply #3 on:** September 05, 2009, 05:41:44 PM »

    Alma Papamihali


STINA E PESTË

Nuk rreshte së kërkuari,
Ndaj stinën e pestë krijove,
Su lodhe së ecuri,
Me hapa heshtjen sfidove.

Ia zhveshe rrobat vjeshtës,
Pranvera puthje nisi të pikojë,
Dimrit i dhe lamtumirën,
Vera të drithërojë.

Nuk rreshte së ecuri
Stinën e pestë krijove,
Atë të dashurisë,
Katër të tjerat sfidove.

Krijove të pestën e vitit,
Të ndihesha si në përrallë,
Ndaj stinët kur ndërrohen,
Të pestën pres me mall.

shaban cakolli · « **Reply #4 on:** September 05, 2009, 05:43:47 PM »

Alma Papamihali


KOHA IME

Së fundi kuptova,
që s´është e thënë
të dashurosh sytë,
apo buzëqeshjen...

Ka dhe të tillë
njerëz në botë,
që dashurojnë kohën,
më shumë se prekjen...

shaban cakolli · « **Reply #5 on:** September 05, 2009, 05:45:17 PM »

LARG VENDIT

Dimër paska qenë vërtetë
Dhe kur verë kam kujtuar,
Dimër paska qenë vërtetë
Thjesht se paskam kuptuar.

Se kam ndjerë kohën të qeshë
Lëkura s'mu ngroh njëherë,
S'paskam parë diell me sy,
Dimër paska bërë në verë.

Sa e doja ngrohtësinë
Sidomos kur kisha ftohtë,
Sa doja të ishte verë,
Gjer në palcë të ndieja ngrohtë.

Dimër paska qenë vërtetë
Veten thonë se gënjen dot,
Ja që ndodh dhe e kundërta
Në një verë shpresova kot.

Ikja, ecja dhe vrapoja,
Vazhdimisht kërkoja verë,
Dimër paska qenë çdo stinë
Si s'u binda menjëherë.

shaban cakolli · « **Reply #6 on:** September 05, 2009, 05:47:07 PM »

RRUGË QË SHKELEN

Kjo rrugë ende më do,
dhe pse çdo ditë e kam shkelur...

Sa rrugë të tilla ka në botë,
që të pafjala kanë ngelur...

shaban cakolli · « **Reply #7 on:** September 05, 2009, 05:48:46 PM »

KUAJT

Kurrë s´ia qava hallin
kalorësit për këmbët,
që i vareshin.
Netëve ulëriva,
me kuajt në stallë.

Më dhimbej,
kurrizi i tyre i dalë..

shaban cakolli · « **Reply #8 on:** September 05, 2009, 05:50:25 PM »

   Alma Papamihali


POETËT

Poetët...ah...poetët,
...............ç´njerëz qenkan,
...................................vallë?

Lindin,
..........të dashuruar,
..................dhe vdesin beqarë.

shaban cakolli · « **Reply #9 on:** September 05, 2009, 05:55:35 PM »

   Alma Papamihali


KUJDES

Nëse një degë këput
mos pyet më pas,
pema si quhet...

Para se dikë të lëndosh,
mundohu të dish,
çfarë duhet...

shaban cakolli · « **Reply #10 on:** September 05, 2009, 05:57:14 PM »

GËNJESHTRA

Kush thotë kurrë s´ka gënjyer,
gënjen!
Kush pyet ç´është gënjeshtra,
gënjen!
Kush thotë gënjeshtër s´ka dëgjuar,
gënjen!
Kush thotë gënjeshtrën ç´e dua,
gënjen!
Derisa në një botë të gënjeshtërt,
rron,
Dhe të vërtetën brenda gënjeshtrës,
gjen.

shaban cakolli · « **Reply #11 on:** September 05, 2009, 05:58:53 PM »

SHPIRT I RI

Çdo mur i dhomës,
ka varur një pasqyrë,
ku veten sheh çdo ditë...

Por të rinohesh,
nuk vlejnë pasqyrat,
që s´depërtojnë në shpirt...

AlbStars · « **Reply #11 on:** September 05, 2009, 05:58:53 PM »

AlbStars